Nagbunggu-anay ang Chinese kag Philippine vessels kaina sang aga matapos ang komprontasyon malapit sa gina-agawan nga teritoryo sa West Philippine Sea.
Parehas naman nga nagabasulay ang duha ka bahin bangod sa colision kasubong man pagpatigayon sang peligroso nga manuever sa kadagatan malapit sa Sabina Shoal, nga nagpalala pa sang tensyon sa duha ka pungsod.
Suno sa China Coast Guard, ginbaliwala sang Philippine vessel ang makapila nila nga warnings kag naghimo sang ”unprofessional kag dangerous” nga manuever nga nagresulta sa collision.
Samtang ini ang ginkontra naman sang Pilipinas sa panindugan nga ang duha ka coast guard vessels nga Cape Engano kag Bagacay ang nagbunggu-anay bangod sa ”unlawful kag aggressive manoeuvres” gikan sa Chinese vessels kaina kapin alas-3:24 sang kaagahon, samtang sila ang magapatigayon kuntani sang resupply mission para sa mga Filipino personnel nga nakastation sa duha ka mga okupado nga isla.
Suno kay Jonathan Malaya, spokesperson sang national security council kag South China Sea task force sa Manila, ang pagbunggu-anay ang nagtuga sang structural damage sa duha ka barko sang Philippine Coast Guard.
Panindugan naman ni China Coast Guard spokesperson Gan Yu, nga illegal nga nagsulod nga wala sang permiso ang duha ka PCG vessels sa kadagatan malapit sa Sabina Shoal.
Pahayag sini nga ang pasulit-sulit nga provocation sang Pilipinas ang nagabayolar sa temporary arrangements sa tunga sang China kag Pilipinas, nga nagatumod sa resupply mission sa Second Thomas Shoal.
Panindugan sini nga sila ang naghimo lamang sang control measures batok sa mga barko sang Pilipinas santo sa layi kag ginapa-andaman ang Pilipinas nga untaton na ang ”infringement kag provocation” ukon magapangatubang sang konsekwensya.
Pasalig naman sang Philippine task force nga ang duha ka barko ang magapadayun sa ila nga mission sa pagsupply sa mga personnel.
