Ginpaidalum sa psychological counseling ang 11 anyos nga bata nga nagsurrender sang 11 ka sachets sang suspected shabu sa Barangay Vista Alegre, Bacolod City.
Nagpanawagan ang Punong Barangay sa mga ginikanan nga atipanon kag himuson ang mga kabataan kun gab-i.
Interview sang Bombo Radyo Bacolod kay Punong Barangay Lindy Deleon
Ini kasunod sang pagkakuha sang 11 ka sachet sang shabu sa onse anyos nga bata sa Abada Escay, Brgy Vista Alegre, Bacolod City sang Hulyo 8.
Sa interview sang Bombo Radyo Bacolod kay Punong Barangay Lindy Deleon, ginpahanumdom sini ang liabilidad ukon salabtun sang mga ginikanan sa ila kabataan, indi lamang sa Barangay Vista Alegre kundi sa kabug-usan.
Aminado ang Punong Barangay nga isa sa karun sa problema amo ang paggamit sang mga menor de edad sang mga durugista bangod ang mga ini ang wala maayo nagakamonitor sang otoridad.
Agud indi maguba ang pinsar sang mga kabataan kag macorrupt sa paghimo sang mga illegal, panawagan sini sa mga ginikanan nga tudluan ang kabataan sang maayo nga pamatasan kag pangginawi, kag ang mga ini ang punpunon kun gab-i.
Aminado si Deleon nga imbes magnubo, kun may madakpan nga durugista, kun kis-a doble pa ang nagabulos.
Gani panawagan sini nga batuan ang root cause sang illegal nga aktibidad, tumuron kun diin nagasupply kag kun paano nagasulod sa lokalidad.
