Ginpakuhaan na sang DNA sample ang bata sang gina-alegar tag-iya sang utod nga mga body parts sang tawo nga ginbilin sa gwa sang National Bureau of Investigation – Bacolod office sang Marso 1, agud ini ang ma-match sa DNA sample sang body parts.
Madumduman nga una na nga ginpahayag ni NBI-Bacolod Head Atty. Renoir Baldovino, nga sila ang may impormasyon na kun sin-o ang biktima nga nagapanag-iya sang mga body parts.
Apang wala ini sang ginbuy-an nga pangalan, magluwas lamang sa impormasyon nga ang biktima ang drug personality kag residente sa ciudad sang Bacolod.
Nagpadulong naman sa NBI National Headquarters si Baldovino agud makapangayo sang assistance sa Technical Division sang ahensya sa pagtumod kun matuod-tuod ang identity nga ginhatag.
Sa interview sang Bombo Radyo Bacolod kay Police Captain Glenn Montaño, station commander sa Bacolod Police Station 2, may pamilya na nga nagpadulong sa ABE Funeral Homes.
Ang gina-alegar bata sang biktima ang ginpakuhaan naman sang DNA sample agud nga ma match inkaso magbalik na ang resulta sang test nga ginpadala sa Manila.
Suno diri, ang gina-alegar biktima ang nadula sang Pebrero 27, samtang nagamatch man ang features sini sa mga body parts nga nasapwan.
Sa pihak nga bahin, aminado naman si Montaño nga may kabudlayan sa pagtumod sa identity sang suspetsado.
Suno diri, magluwas nga wala naga-andar ang CCTV camera sang NBI sang natabo ang insidente, wala man sang may nacapture ang CCTV footage gikan sa katupad nga Provincial Veterinary Office.
Sa karun, ginadihon man nila nga makalantaw sa CCTV footage gikan sa kalapit nga Business Process Outsourcing (BPO) company, agud matsekyar kun may nagalakat, salakyan ukon motorsiklo nga nakalabay sa lugar, nga mahimo matumod nga suspect.
