Kun pamangkuton kun ano ang pinakamahal nga produkto sa industriya sang karne, indi gid mapinsaran sang kadam-an ang gallstones ukon bato sa apdo sang isa ka baka.
Apang ang matuod, ang gagmay nga tig-a nga deposito sa apdo sang baka ang pinakamahal, kun kaisa mas mahal pa sangsa bulawan.
Sa maragtas sang medisina sang China, ginagamit ang gallstones sang baka sa tradisyunal nga bulong, agud bulungon ang nagkalain-lain nga balatian kaangay sang high blood pressure kag mga heart diseases.
Bangud sa mataas nga numero sang stroke sa China, nagsaka pa gid ang demand sang gallstones, pati ang presyo sini.
Sang tinalikdan nga tuig, nagdangat sa kapin $6,000 kada isa, doble sang presyo sang bulawan sang amo nga tuig.
Ginhingadlan ini nga Niu Huang kag ginagamit sa paghimo sang bulong nga ‘Angong Niuhuang Wan’ nga ginareseta para sa mga malala nga kondisyon kaangay sang stroke, coma, kag sa problema sa utok.
Apang, tumalagsaon lamang ang gallstones sa baka, nga masami makuha sa mga tigulang na nga baka.
Bangud sini, mas nagmahal kag may yara na sang illegal trading, amo man sang smuggling sa sulod sang slaughterhouse.
