Ginpasalig sang Bacolod City Police Office ang tanan nga bulig nga kinahanglan sang pamilya sang pulis nga napatay matapos gintiro sang subject person sa drug buy-bust operation sa atubang sang isa ka lodging house, Alijis Road, Brgy Singcang Airport, Bacolod City pasado alas-10:00 kagab-i, Abril 9.
Ang biktima ang ginkilala nga si Police Master Sergeant Romulo Galvez, miyembro sang Station Drug Enforcement Team (SDET) sang Bacolod Police Station 9.
Sa interview sang Bombo Radyo kay Police Col. Eugene Rebadomia, Officer in Charge sang Bacolod City Police Office, tanan nga benepisyo kag suporta ang gilayon nga ihatag sang Philippine Natioal Police sa pamilya ni Galvez.
Suno kay Rebadomia, nakighinun-anon man ini gilayon si Bacolod City Mayor Greg Gasataya sa PNP agud nga maghatag sang suporta sa pamilya sang biktima.
Suno diri, sila ang nag-abot sa lugar pila ka minuto matapos natabo ang krimen kag naghingagaw man padulong sa ospital kun sa diin gindala si Galvez antes ini ginbawian sang kabuhi.
Dugang pa, temporaryo nga gindala sa ospital ang suspect bangud ini ang nakaagom man sang minor injury matapos nga magbato kag nagpukutay sa biktima.
Ginakasubo sini ang natabo kag mensahe ni Rebadomia sa kapulisan nga magdugang sa paghalong sa tion sang operasyon.
Pasalig sini nga indi sila madulaan sang determinasyon kag mas pasanyugon pa ang ila nga operasyon sa batok sa bisan ano nga ilegal nga mga aktibidad sa ciudad.
May gintalana na nga Survival Police Non-Commissioned Officer ang Police Regional Office – Negros Island Region nga magaasikaso sa assistance kag benefits sang pulis nga napatay matapos gintiro sang subject person sa drug buybust operation sa Alijis Road, Brgy Singcang Airport, Bacolod City kagab-i.
Madumduman nga ang napatay ang ginkilala nga si Police Master Sergeant Romulo Galvez, 43 anyos, miyembro sang Station Drug Enforcement Team (SDET) sang Bacolod Police Station 9.
Sa interview sang Bombo Radyo Bacolod kay PRO-NIR Spokesperson Police Lt Col Joem Malong, gilayon nga nagpatawag sang meeting si PRO-NIR Director Police Col Arnold Thomas Ibay matapos ang insidente.
Pahayag sini nga ang Philippine National Police ang may survival PNCOs nga nagaproseso sang mga benepisyo kag bulig sa mga pamilya sang pulis nga mapatay sa serbisyo.
Suno diri, manug 19 ka tuig na kuntani sa serbisyo si Galvez subong nga tuig.
May scholarship man nga mabatun sa pag-eslwela sang bata sang pulis.
Aminado si Malong nga bisan pila pa ang kwarta nga ihatag, wala sang kabaylo kag indi na mabalik ang nadula nga kabuhi.
Apang bisan paano, nagalaom sila nga makabulig sa pamilya ang bulig pinansyal.
Sa pihak nga bahin, pahanumdom man ni Ibay sa mga kapulisan nga top priority ang ila nga safety.
Panugyan sini nga ireview ang Standard Operating Procedure (SOP) antes ang operasyon.
Suno diri, plastado na ang mga SOP, gani dapat nalang makita ang gaps sa mga pagpatuman kag ma-address agud malikawan ang mga trahedya.
