Liwat nga nagpahanumdom ang Bacolod City Police Office (BCPO) sa mga driver sang public utility jeepneys (PUJs) nga tsekyaron ang mga pasahero kun nagasuksok sang face shield agud nga indi sila mamultahan sa tion nga madakpan.
Sa interview sang Bombo Radyo Bacolod kay Police Lt. Ma. Liberty Indiape, tagpamaba sang Bacolod City Police Office, padayon ang hugot nga pagpatuman sang pagsuksok sang facemask kag faceshield sa PUJs halin sa pagsugod sang COVID-19 outbreak.
Ginarecord man sang BCPO kada adlaw ang mga naglapas sa pagsuksok sang facemask kag face shield kag indi pagsunod sang social distancing.
Ginatsekyar man sang BCPO personnel ang mga PUJ kag ginaremind ang mga drivers nga siguruhon nga ang mga pasahero ang nagasuksok sang facemask kag faceshield.
Ginpahayag man ni Indiape nga may kinamatarong ang mga driver sa pagpapanaog sang mga pasahero nga wala nagasuksok sang faceshield kag facemask bangud indi lang ang pasahero ang mamultahan kundi pati ang driver ang manabat man.
Ginpahayag man sang tagpamaba nga ang multa sang madakpan nga naglapas sa facemask kag faceshield ang yara sa P200 kun ini ang residente sang Bacolod City apang kun ini ang residente sang probinsya sang Negros Occidental, magabayad sang P300 apang kun indi makabayad, iendorso ini sa Bacolod City Health Office para sa community service.
