Naghatag sang mga pahanumdom ang tagpamaba sang Bacolod City Police Office (BCPO) sa mga kabataan kag ginikanan kaangot sa ginaalegar nga pagpanghimulos sang isa ka tricycle diver sa isa ka kinse anyos nga babayi sa ciudad sang Bacolod kahapon.
Madumduman nga mga alas-7:30 ang takna kahapon sang aga sang nagsakay ang dalagita sa tricycle agud mapadul-ong sa eskwelahan apang sang nagabiyahe na sila, naghambal ang suspect nga makuha lamang ini sang cellphone tubtub nakalab-ot sila sa Hacienda Gonzaga sa isa ka barangay sa ciudad sang Bacolod kag gindala sa katubuhan kag didto ginhimuslan.
Matapos ang pagpanghimulos, gindul-ong man gilayon sang suspetsado sa eskwelahan ang bata.
Sa interview sang Bombo Radyo kay Police Lieutenant Colonel Ariel Pico, nagpahanumdom ini sa mga kabataan nga indi magsakay sa mga tricycle nga bag-o ang hitsura, wala sang pinta kag plaka kag kun indi nila kilala ang driver.
Suno kay Pico, kun magsakay sa tricycle, siguraduhon nga may yara sang grupo nga upod kag indi nagaisahanon agud matahap ang driver nga mag-ubra sang malain bangud may yara sang mga testigo.
Gintugyanan man sang spokesperson ang mga ginikanan nga kun masarangan, idul-ong kag sugaton ang mga kabataan sa eskwelahan ukon hatagan ini sang cellphone agud hapos nga macontact.
Suno kay Pico, lain na ang tiyempo subong sang sa sang una gani kinahanglan gid nga maghalong.
