Nagapanawagan ang Bacolod City Police Office (BCPO) sa publiko nga untatan na ang pag-discriminate sa mga mga frontliners ilabi na sa mga health workers.
Ini ang kasunod sang pagpadala sang sulat sang pamunuan sang Riverside Medical Center kay Governor Eugenio Jose Lacson nga nagahingyo sang bulig bangud nga ginapakamalaot sila sang iban kasunod sang una nga kumpirmado nga kaso sang coronavirus disease 2019 (COVID-19) sa ciudad.
Nakasaad sa sulat nga ginpadala ni RMCI Corporate Communications Chuck Estrella nga may mga medical staff sila nga wala ginapasakay sa tricycle, trisikad ukon sa mga jeep.
May pila man sa ila nga ginahambalan sang malain nga tinaga sang mga pulis.
May yara man sang ginapahalin sa ila nga mga boarding house.
Sa interview sang Bombo Radyo Bacolod kay BCPO spokesperson LP/Lt.Col. Ariel Pico, ginpahayag sini nga masubo ini panumdumon para sa mga health workers nga gina-risgo ang kabuhi.
Aminado man si Pico nga indi mabasol ang iban nga magpang-discriminate bangud indi lahog-lahog ang virus apang indi husto nga pakamalauton ang mga frontliners.
Suno kay Pico, dapat nga hatagan pagtamod man sang gobyerno ang mga frontliners ilabi na ang mga medical staff agud mauntat na ang pag-discriminate sa ila.
Suno sa iya, kuntani hatagan nalang sang libre nga akomodasyon ang mga frontliners kag libre nga pagkaon agud malikawan na ang paggwa nila sa ospital.
