Pila ka mga anggulo ang ginatutukan sang kapulisan tuhoy sa motibo sa pagluthang-patay kay Barangay Kagawad Romeo Canlas Jr., sang Barangay 2, ciudad sang Bacolod, Sabado sang gab-i.
Madumduman nga naga-inom-inom ang biktima upod ang anom ka mga abyan sang nakibot na lamang ang mga ini nga may nagpalapit sa ila nga anom ka mga naka-bonnet nga armado nga mga lalaki kag nagpamangkot kun kilala nila si alyas “Ferlyn”.
Ginpahapa ang mga ini samtang ginapamangkot kun ano ang ila pangalan.
Hinali na lang nga ginpatindog si Canlas kag ginpahigad sang mga armado kag gintiro sang makapila ka beses.
Gilayon naman nga nagpalagyo ang mga suspetsado sakay sa pribado nga salakyan.
Ginhingagaw pa dala sa Corazon Locsin Montelibano Memorial Regional Hospital si Canlas apang gindeklarar nga dead on arrival.
Sa press conference nga ginpatigayon sa Bacolod Police Station 4 kaina sang aga, ginpahayag ni BCPO Spokesperson Police Lt. Colonel Ariel Pico nga may yara sila sang tatlo ka mga anggulo nga ginalantaw tuhoy sa motibo sa krimen.
Una diri suno kay Pico, ang kaangtan sa illegal nga droga bangud yara sa watchlist sang BCPO si Canlas sang 2018.
Ginalantaw man nga anggulo ang personal grudges bangud posible nga may yara ini sang kontra.
Wala man ginadula suno sa BCPO spokesperson ang anggulo may kaangtanan sa politika.
Nahibaluan nga si Canlas ang nagapanguna nga barangay kagawad sa ila nga barangay.
Gindugang man ni Pico nga kun indi ini masolbar sa station level, marequest siya sang special task force agud maka-access sa iban nga mga government agencies kag laboratory.
Suno naman kay Police Major Reynante Jomocan, station commander sang Bacolod Police Station 4, posible nga cover story lang sang mga suspetsado si “Ferlyn” agud makasulod sila sa lugar.
Nagapati man ini nga ginplanuhan sang maayo ang pagpangluthang bangud kabisado sang mga suspetsado ang lugar kag diretso ang ila nga pagsulod sa puluy-an.
Ginpahayag man sini nga apisar sang mga alegasyon ilabi na nga may kaangtanan sa illegal nga droga ang biktima, tutukan nila gihapon ang tanan nga anggulo.
