Padayon ang imbestigasyon sang Bacolod City Police Office sa insidente sang pagpanghaboy sang granada sa Prk Villa, Brgy Tangub, Bacolod City kahapon sang kaagahon.
Suno kay Bacolod City Police Office Director Police Col. Joeresty Coronica, sa tatlo ka granada nga ginahaboy sa gwa sang balay ni Alyas Robert nga nagapanag-iya sang rent a car, isa diri ang naglupok samtang ang duha naman nga narekober yara na sa safety.
Suno diri, gina-imbestigaran pa kun paano nga ang isa ka granada nga narekober nasab-it sa grills sang bintana kag sang gintsekyar wala ini sang unod nga pulbora, samtang ang isa naman ka granada nga wala naglupok yara lamang sa idalum.
Suno pa diri, sa pagtskeyar sa rekord sang CCTV, wala sang may narekord halin alas-7:00 sang gab-i tubtob alas-9:00 sang gab-i.
Sa karun makig-angot pa sila sa Armed Forces of the Philippines agud mahibaluan kun diin na-issue ang mga nakumpiskar nga granada.
