Aminado ang tagpamaba sang Bacolod City Police Office ukon BCPO nga ang mga suspetsado sa pagpangawat ang may kaangtanan man sa pagbaligya sang iligal nga druga.
Sa interview sang Bombo Radyo Bacolod kay Police Lt. Col. Ariel Pico, ginpahayag sini nga bangud naghina sa karun ang supply sang illegal nga druga, madamo naman ang nabiktima sang pagpangawat kag kalabanan pa nga mga biktima ang nagaistar sa mga subdivision.
Suno kay Pico, dako ang posibilidad nga isa lamang ka grupo ang nagapangawat sa ciudad kag may yara na sila sang ginreview nga roster gallery agud matumod ang group.
Madumduman nga ginbiktima sang kawatan ang balay sadto sang isa ka doctor sa garden ville subdivision nga nakakuha sang masobra isa ka milyon ka pesos kag isa man ka balay sa Brgy. Estafania, ciudad sang Bacolod nga may ginkuha man nga P400 mil.
May nakuha man sila nga impormasyon nga nakatabok man sang una ang mga kawatan sa isla sang Panay agud magpangbiktima apang nagbalik ang mga ini sa ciudad sang Bacolod bangud tumandok sila sang ciudad.
Nakighinun-anon man si Pico, ilabi na sa low cost nga mga subdivision nga magbutang sang CCTV cameras para man sa siguridad sang mga ini.
Nagpanugyan man ini sa publiko nga kun may yara sang manuktok nga indi man lang kilala, indi nalang pagbuksan.
Sa karun, may mga persons of interest na ang mga pulis kun kanday sin-o ang sa likod sini bangud man sa nakuha nga footage sang CCTV camera.
