Nagpahanumdom ang katapo sang Bacolod City Bureau of Fire Protection sa publiko angot sa mga nagapang-food scam gamit ang mga pangalan sang City Fire Marshal sa mga banwa kag ciudad.
Sa interview sang Bombo Radyo kay Bacolod BFP Spokeperson FO2 Paul Servano, sang tinalikdan nga semana, duha ka insidente ang natabo kun sa diin nabiktima sang food scam ang Himamaylan City Fire Station kag Binalbagan Municipal Fire Station.
Suno kay Servano, ang mudos sang scammer amo ang ma-order sila sang masobra linibo nga mga pagkaon kag gamiton ang pangalan sang City Fire Marshal.
Suno diri, sa bahin sang Himamaylan City Fire Station, gintawgan sang isa ka delivery rider ang City Fire Marshall bangud kilala niya ang pangalan sang nag-order.
Apang nakibot na lamang ang City Fire Marshall bangud wala ini siya sang may gin-order kag didto na natukiban nga scam ini.
Samtang sa isa pa ka insidente sa Binalbagan Municipal Fire Station kun sa diin nag-order ang scammer pero naghambal ini nga magpadala anay sang P4,000 pesos sa Gcash.
Bangud kilala sang mga empleyado ang gingamit nga pangalan sang City Fire Marshall gilayon naman sila nga nagpadala sang kwarta.
Apang sang pagkomprontar nila sang BFP personnel, gihambal sini nga wala gid siya naka-order kag wala man ini nagpangayo sang kwarta.
Suno kay Servano, paagi sa landline ang gingamit nga number sang mga scammer agud indi sila madasig nga ma-trace.
Bangud sini, pahayag ni Servano nga sila ang nagpost naman sa ila facebook page sa mga number nga nagamit sang mga scammer agud mangin aware ang publiko.
