Ginpahayag sang Secretary-General sang Bangon Sambayanan People’s Movement nga nakita nila ang Trillanes pattern sa paggwa ni dismissed Policeman Rodulfo Gracioso Jr. nga naga-alegar nagdul-ong sang male-maleta nga kwarta sa pamilya Duterte.
Sa interview sang Bombo Radyo Bacolod kay Jefrey “Ka Eric” Celiz, nakilala na nga butigon si former senator Antonio “Sonny” Trillanes IV.
Positibo ini nga si Trillanes amo ang director, sciptwriter, kag financier nanday Peter Joemel Advincula alyas Bikoy, kag Ramil Madriaga.
Si Bikoy ang nakilala sa pagpagwa sini sang video online nga may tigulo nga “”Ang Totoong Narcolist” sang 2019.
Sa ulihi, ini ang nag-ako man nga siya ang ginsugo lamang nanday Trillanes, kag iban pa sini nga kaupdanan.
Ang ikaduha amo si Madriaga nga nagpakilala nga former aide kag bagman ni Vice President Sara Duterte.
Suno kay Celiz, ginpanginwala pa ni Celiz nga siya ang nadismiss sa serbisyo, apang ginkumpirmar man sang PNP nga ini ang nag-apelar pa sa dimissal gani imposible nga wala ini nakahibalo nga siya ang gindismiss sa serbisyo.
Si Madriaga ang wala man ginpresentar sa hearing sang flood control corruption, nga suno kay Celiz mahimo bangod sa kahadlok nga matukiban ang mga kabutigan kag himo-himo nga estorya.
Samtang si Gracioso amo ang ikatatlo na nga gingamitan ni Trillanes sang kaangay nga pattern.
Aminado si Celiz nga indi mahapos mapamatud-an kun matuod ang litrato kag video nga ginagamit sang naga-akusar, bangod ini ang sarang na mahimo sang AI nga daw matuod-tuod.
Apang indi mabutigan ang actual records.
Suno diri, alegasyon ni Gracioso nga tatlo ka van ang gingamit sa pagdeliver sang male-maleta nga kwarta, apang kwestyon pa kun ano ini makalab-ot mismo sa Presidente.
Pahayag sini nga dapat pamatud-an kun diin naglabay ang van, bangod sa alegasyon ginhimo ang pagdeliver kadungan sang quarantine period bangod sa COVID-19 outbreak.
Dugang pa sini nga bisan sanday VP Sara kag iban pa sini nga himata ang indi derekta nga makapalapit kay former President Duterte, kag kinahanglan pa magset sang appointment kay Senator Bong Go.
Gani kwestyon kun ano ang koneksyon ni Gracioso para siya ang hatagan sang special treatment agud personal nga makatransaksyon kay Duterte.
