“Butigon kag Talawan,” ini ang nangin paglaragway sang Secretary-General sang Bangon Sambayanan People’s Movement kay former senator Antonio Trillanes IV.
Sa interview sang Bombo Radyo Bacolod kay Jeffrey Celiz alyas Ka Eric, gintawag sini nga ‘butigon’ si Trillanes bangod nagapati ini nga ang pag-atras sini bilang witness sa impeachment trial ni Vice President Sara Duterte, ang indi bangod siya ang wala ginakilala sang Senate Impeachment Court.
Suno diri, luyag ni Trillanes nga mauna siya nga ipresentar sangsa Anti–Money Laundering Council (AMLC), Bureau of Internal Revenue (BIR), kag mga banking institutions kaangay sang Bangko Sentral ng Pilipinas, nga may otoridad sa pagtalakay sa mga isyu angot sa manggad.
Panindugan ni Celiz nga wala sang kaangay nga otoridad si Trillanes rasun nga siya ang wala ginpadal-an sang subpoena, apang ginhatagan sang pahanugot ang prosekusyon, nga makapresentar kun gusto nila ini nga magwitness.
Apang suno diri, ‘talawan’ si Trillanes bangod nakahibalo ini nga sa pag-atubang sa witness stand, siya ang maga-take oath kag sarang nga mapriso kun magbinutig.
Dugang pa niya nga nahadlok si Trillanes nga ma-subject sa cross examination sang defense counsel.
Nagapati ang mga ini nga ‘gulpi de gulat’ ukon ‘scare tactic’ lamang ang ginhimo ni Trillanes.
Suno diri, wala gid man sang plano nga mag-atubang sa impeachment court si Trillanes bangod himo-himo lamang sini ang mga dokumento.
Pahanumdom ni Celiz nga bisan sin-o ang sarang makahimo sang power-point sang mga wala sang pamatuod nga alegasyon.
Suno diri, indi ini first time para kay Trillanes, bangod sadto, ginpato-patuan man sini si former President Rodrigo Duterte nga may ginkawat nga P200 million kag gintago sa bangko.
Apang sang gintsekyar, P16,000 lamang ang unod sang bank account sang anay Presidente.
Hangkat ni Celiz nga kun matuod ang ginpresentar niya nga dokumento, ini ang iya panumpaan kag magtestigo sa impeachment trial.
