Yara pa sa P80 tubtob P100 million ang mga wala mabayaran nga bill sang kuryente sa idalom sang Central Negros Electric Cooperative.
Sa interview sang Bombo Radyo Bacolod kay Atty Arnel Lapore, iban sa mga ini ang electric bill sang bulan pa sang Hulyo, Agusto kag Setyembre, antes pa magtake-over sa billing ang Negros Electric and Power Corporation (NEPC).
Suno diri, 80 porsyento sang wala masukot ang residential samtang 20 porsyento naman ang commercial.
Paathag ni Lapore nga ang mga ini ang ground gihapon sa disconnection.
Suno diri, may mga nagapalapta sang balita nga indi na kinahanglan nga bayaran ang past due billings bangod Negros Power na ang panibag-o nga nagamanage sang power distribution.
Apang suno kay Lapore, ginahatagan lamang nila sang ligwa ang Negros Power bangod yara pa sa migration phase bangod sila ang naggamit sang lain nga system kag wala gin-adoptar ang system sang CENECO.
Sa tion nga magligwa na sa Negros Power, ila nga iga-endorso ang listahan sang wala makabayad para sa disconnection.
Gani panawagan sini sa mga may-ara pa sang unpaid bills nga ini ang isettle na samtang wala pa mapadal-an sang demand letter sa talatapan sang Negros Power.
Kun mabug-at gid ang balayran nga bill, maestoryahan man ang iban nga mode of payments.
Paandam sini nga sa idalom sang Negros Power, indi gid mabalik ang kuryente tubtob may-ara pa sang wala nabayaran nga billing.
Samtang ila naman nga hitsuon nga mapahat-pahat ang dividends sang mga member consumer bilang miyembro sang kooperatiba sa cut-off date nga Hulyo 21, 2024.
