Dako nga bulig ang biodiesel sa mga fisherfolks sa Barangay Banago, Bacolod City suno sa presidente sang Banago Integrated Fisherfolks Association.
Sa interview sang Bombo Radyo Bacolod kay Joel Legada, dako nga bulig para sa mga mangingisda ang biodiesel bangud sa karun nga tinion tuman na kamahal ang diesel nga ginagamit sang mga ini nga gatong sa ila mga fishing boat kun magpanagat.
Suno kay Legada, nagapasalamat sila nga gindala ang mga ni Punong Barangay Baldo Benjamin sa ginpatigayon nga Biodiesel Launching Program nga ginpangunahan ni Bacolod City Lone District Representative Alfredo “Albee” Benitez.
Suno diri, nawitness sang mga ini kun paano ginaubra ang biodiesel.
Tinutuyo man ni Congressman Albee Benitez nga ipanagtag ang isa ka brewing machine sa paghimo sang biodiesel sa tagsa ka Barangay sang ciudad.
Sa brewing machine ang ginabutang ang used cooking oil kag ginabutangan sang chemical kag ginapabukalan tubtob nga mangin biodiesel.
Ang nasambit nga produkto ang mahimo mabakal sang P35 tubtob P40.00 kada litro.
Nabaton na sang Banago Integrated Fisherfolks Association ang isa ka gallon sang biodiesel nga mahimo nila testingan nga gamiton sa ila nga pagpanagat.
Tinguhaon man sang Punong Barangay sang Barangay Singcang-Airport nga mapagamit ang biosel sa mga residente, agud mapanilagan ang resulta sini.
Sa interview sang Bombo Radyo Bacolod kay Punong Barangay Rosinie Distrito, ang Barangay Singcang-Airport ang may yara sang 700 ka mga fisherfolks, nga nasugilanon naman sini kag nahibaluan nga pila sa ila ang nagagamit sang gasolina.
Suno kay Distrito, ang mga nagagamit sang gasolina ang mapilitan nga magconvert agud nga makasave.
Nagapati si Distrito nga dako gid ini nga bulig sa mga mananagat sang Barangay Singcang-Airport.
Suno diri, luyag nila nga makita kun ano ang mangin resulta sa pagpagamit sang biodiesel.
Ginpasalamatan sini ang biodiesel program nga ginlunsyar ni Congressman Albee Benitez nga dako gid nga mabulig sa mga pumuluyo.
