Above average ang ratings ni House Deputy Speaker kag Bacolod City Lone District Representative Alfredo “Albee” Benitez sa ikalima nga State of the Nation Address (SONA) ni President Ferdinand “Bongbong” Marcos Jr.
Sa interview sang Bombo Radyo Bacolod kay Bacolod City Councilor Atty Caesar Distrito, spokesperson ni Benitez, ginadayaw sang kongresista ang komprehensibo kag maunod nga SONA sang Presidente.
Kun sa diin nabatian ang pag-eksplikar sini sa seryoso nga pagsolbar sa kurapsyon, nga may-ara sang dako nga impact sa pungsod.
Kasubong man ang pahayag ni Marcos sa pagdepensa sa soberanya kag indi pagsugot nga ginabully lamang sang iban nga pungsod.
Partikular na ang AI-generated caricature videos nakaligad sang China nga nagalaragway sa mga Pilipino nga mango nga amo.
Samtang ginpahayag man sang Presidente ang madasig nga recovery efforts sang gobyerno apisar sa global crisis.
Suno kay Distrito, nakita ni Benitez ang efforts ni Marcos nga mabuligan ang mga yara sa laylayan, paagi sa paghatag sang mga ayuda; kasubong man sa working sector paagi sa pagpasaka sang tax exemption.
Kun sa diin gikan sa karun nga may P250,000 yearly income nga subject sa tax, ini ang pasakaon sa P350,000; kasubong man sa amnesty sa corporate income tax kag penalties, nga dako nga bulig sa madamo nga pumuluyo.
Kag ang pinakanagtatak para kay Benitez amo ang pagduso nga madula ang system loss charges sa electricity bill.
Panindugan ni Benitez nga wala rasun nga ini ang bayaran sang konsumedor bangod indi man sala sang mga electric consumers sa system losses.
