May pahanumdom ang bise alkalde sa ciudad sang Bacolod sa mga Barangay sa ila nga papel agud malikawan ang mga nagaluntad nga sunog.
Ini kasunod sang asod-asod nga sunog sa Purok Kagaykay, Barangay 2 kahapon Hulyo 31 kun sa diin nagdangat sa 81 ka balay ang nasunog kag ginsundan sang sunog sa Purok King Fisher A, Barangay 16 kaina sang kaagahon kun sa diin 15 ka balay ang nahalitan.
Sa interview sang Bombo Radyo Bacolod kay Bacolod City Vice Mayor El Cid Familiaran, sa Barangay 2, nagdangat sa 73 ang totally damaged samtang walo naman ang partially damaged; samtang sa Barangay 16, napulo ang totally damaged kag lima ang partially damaged.
Sa statistics sang Bureau of Fire Protection, makita nga kalabanan sa mga sunog ang nagakatabo sa mga informal settlers kag tuga sang faulty lines kag substandard wirings nga masami tuga sang pagtap sang kuryente, naglupok nga butane cannisters kag natumba nga kandila.
Samtang ang sa Barangay 2 ang natumod naman nga tuga sang ginsindihan nga paper egg tray nga gingamit sa pagpanabog sang lamok.
Pahanumdom ni Familiaran, nga ang fire prevention ang wala lamang dapat ginafocus sa bulan sang Marso kun sa diin ginasaulog ang Fire Prevention Month.
Sa baylo, ini ang dapat ginahimo adlaw-adlaw bangod bisan karun nga tig-ululan, masako gihapon ang sunog.
Panugyan sini sa mga Barangay nga magpatigayon sang information dissemination sang mga fire safety and prevention tips.
Sarang man nga makahimo sang audio recording kag i-play samtang nagalibot sa Barangay, agud magserbe nga pahanumdom sa mga pumuluyo sa mga dapat likawan agud indi makatuga sang sunog.
Pahanumdom ni Familiaran sa mga Barangay nga malikawan ang sunog kun sila ang may ginahimo kag indi dapat nga ipasa sa City Government ang paghatag sang tanan nga solusyon.
