May-ara sang 170 ka bag-o nga Jail Officer 1 sa Bureau of Jail Management and Penology – Negros Island Region (BJMP-NIR).
Sa interview sang Bombo Radyo Bacolod kay Jail Senior Inspector Atty Juniven Umadhay, spokesperson sang BJMP-NIR, ang oathtaking ceremony ang ginpatigayon sa Bacolod City College.
Ini amo ang pioneering batch sang mga Jail Officer 1 sumugod sang gintukod ang Negros Island Region, nga ginalakipan sang 34 ka babayi kag 136 nga lalaki.
Ang mga bag-o nga personnel ang tumandok man mismo sang Negros Occidental, Negros Oriental kag Siquijor.
Sila ang temporaryo nga i-assign sa BJMP offices kag ipaidalom sa 4-months training.
Ini agud sila ang matudluan sang mga kinahanglan nga mabal-an kag skills bilang Jail Officers, antes ideploy sa mga jail facilities ukon opisina.
Aminado si Umadhay nga dako gihapon ang deperensya sa standard ratio sang jail personnel kag persons deprived of liberty (PDLs), apang dako na nga dugang ang 170.
Pahayag sini nga ang standard kag ideal ratio sang BJMP, ang one is to one plus one ukon isa ka jail officer sa kada isa ka PDLs, kag dugang nga backup officer para sa pagpatigayon sang escorts.
Suno kay Umadhay, 8,500 ang total PDLs sa NIR, mas madamo pa sangsa PDLs sa Region 6.
Pahayag sini nga sa Negros Occidental District Jail, may-ara sang masobra 600 nga PDLs, apang yara lamang sa 50 ang jail officers; samtang sa kapin isa ka libo nga priso sa BJMP-Handumanan, sila ang may 70 tubtob 80 lamang nga jail officers.
Sa pihak nga dako pa gihapon ang kulang, ginapasalamat sini ang 170 ka gindugang, bangod sang tinalikdan yara lamang sa 15 tubtob 30 ang ginadugang kun mag-hiring ang BJMP.
