Nadagdag sa homicide ang kaso nga ginpasaka sa body guard nga nagluthang-patay sa iya boss sa Barangay Villamonte, Bacolod City sang Lunes sang hapon.
Ang biktima ang ginkilala nga si Jun Alaba, residente sang Barangay Estefania, Bacolod City samtang ang suspect amo si Ronel Rafael, 34 anyos, tumandok sang banwa sang Toboso.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, makabig na nga solved ang kaso ilabi na nga nag-ako naman ang suspetsado.
Suno sa asawa sang biktima, masobra isa ka tuig pa lamang nga nagatrabaho upod sa iya bana ang suspect.
Nahibaluan nga magluwas sa pagserbe bilang body guard si Rafael ang nagapatigayon man sang mga kliyente sa iya boss nga nagapautang.
Ginalantaw nga nagbaisay ang duha samtang yara sa sulod sang salakyan may kaangtanan sa issue sang pagsuktanay kag remmitances sang mga nagapangutang.
Sa pihak nga bahin wala naman sang record sa kapulisan bisan sa Barangay si Rafael sa banwa sang Toboso.
Sa interview sang Bombo Radyo Bacolod kay Police Major Jun Ray Batadlan, hepe sang Toboso Municipal Police Station, gilayon man nila nga gintrace ang original residence sang suspect kag natumod nga sa Barangay General Luna, Toboso.
Sa imbestigasyon, nahibaluan nga madugay naman nga wala na nakapauli sa banwa si Rafael humalin sang ini ang nagpadulong sa ciudad sang Bacolod.
Magluwas nga wala sang may nakita nga record sini sa Barangay kag kapulisan, bisan ang iya nga pamilya ang matinlo man ang record.
