Nakuha sang Bombo Radyo Bacolod ang tatlo ka award sa ginpatigayon nga awarding ceremony sa World Radio Day Celebration sa ciudad sang Bacolod kahapon.
Ang okasyon ang ginpatigayon sa idalom sang City Ordinance 08-14-792 series of 2014 nga nagamando sang selebrasyon sang World Radio Day.
Ang Bacolod City lamang ang may ordinansa natuhoy sa pagselebrar sang kahiwatan.
Ginpatigayon ang selebrasyon sa Green Gardens, Villa Angela, Bacolod City kag ini ang may tema nga Kalantipan sa Kahanginan: Broadcasting Excellence Awards.
Sa mensahe ni Bacolod City Lone District Greg Gasataya, ang World Radio Day ang ginaselebrar Pebrero 13 bangud ini ang una nga adlaw sang pag-umpisa sang United Nations Radio nga may tinutuyo sa paghatag sang communication kag impormasyon.
Ginpahayag man sini nga isa man siya sa mga Radio Broadcasters sanguna.
Ang Bombo Radyo Bacolod ang nakakuha sang tatlo ka awards nga ginlakipan sang Best Radio News Program, Best Radio News Caster, kag Best Radio Mobile Journalist.
Ang award ang ginbaton ni Bombo Mia Mae Francisco.
Ginpanginbulahan man ni Bacolod City Councilor Jayson Villarosa, Chairman, Committee on Information and Communication Technology ang tanan nga media practicioners ilabi na ang yara sa radyo sa padayon nga paghatag sang nagakaigo nga impormasyon sa mga pumuluyo paagi sa pagwaragwag sa kahanginan.
