Kadungan sa kontrobersyal nga isyu sang pagtampa ni Will Smith kag Chris Rock sa Oscars awards ceremony, ginsakyan pa ini sang social media personality kag boxing promoter pinaagi sa pag-offer sang 15 million dollars sa kada isa sa mga imbulbado kun sila ang magatungtong sa ring kag sulbaron ang problema pinaagi sa boksing.
Madumduman nga ginsulong ni Smith sa babaw sang stage si Rock samtang yara sa televised ceremony kag ini ang gintampa makaligad nga nag-joke ang host natuhoy sa appearance sang asawa ni Smith.
Suno kay Jake Paul nga nagapadalagan sang Most Valuable Promotions, may nakapreparar na ini nga 15 million dollars para kay Will Smith kag 15 million dollars para kay Chris Rock.
Panugyan sini nga patigayunon ang boksing sa Agusto bilang undercard bout sa hampang sini batok sa wala pa nahingadlan nga kasumpong.// Dugang pa sini nga gilayon nga tawagan si Will Smith kag ipasugilanon sa iya.
Nahibaluan nga wala na nagpasaka sang kaso si Rock batok kay Smith, nga nagdaog sang Best Actor award makaligad sang insidente, kun sa diin sa speech sini siya ang nagpangayo man sang pasaylo sa Oscars Academy.
Ginsundan pa ini sang pormal nga public apology sang aktor.
Sa pihak nga bahin, nangin trend naman sang damlag lang ang mga boxing matches sang mga celebrities nga nakabulig man sa pagkakilala kanday Paul kag sa utod sini nga nga si Logan, nga nahibaluan una nga nakilala sa internet antes nagsulod sa boksing.
Apisar nga makagalanyat ang ideya, kaangay nga malayo naman nga matabo ang hampang sa tunga sang 53 anyos nga si Smith kag 57 anyos nga si Rock.
Ginalantaw naman nga dako ang bentaha ni Smith sa edad, height kag kabug-aton batok sa komedyante nga si Rock, dugang pa nga anay nakahampang na batok sa boksidor nga si Muhammad Ali sang 2001 si Smith sa pelikula nga “Ali”.
