BACOLOD CITY — Ginahanda na sang Bacolod Traffic Authority Office ang reklamo batok sa British national nga nangyawyaw sa amo nga talatapan.
Suno kay BTAO head Police Superintendent Luisito Acebuche, gindakop si Benjamin Oates, temporaryo nga nagapuyo sa Hillside Subdivision, Barangay Mansilingan matapos nag-illegal parking sa corner San Sebastian-Lacson Streets sang Huwebes.
Siya ang gin-isyuhan sang traffic enforcer nga si Roilan Gulmatico sang citation ticket bangud ginadumilian ang pagparking sa dalan Lacson.
Apang sang nabaton na niya ini, ginsulatan ni Oates ang citation ticket sang f**k BTAO.
Sang Biyernes suno kay Acebuche, nagkadto ang British national sa iya opisina agud gawaron kuntani ang iya lisensya apang wala niya ini ginrelease.
Suno sa BTAO head, igaendorso pa nila ang reklamo sa Land Transportation Office sa Lunes.
Pagatukibon man sini kun authentic ang driver’s license sang natungdan.
