Gintay-og sang magnitude 7.2 kag magnitude 7.5 nga linog ang pungsod Venezuela sa sulod lamang sang isa ka minuto.
Santo sa US Geological Survey (USGS), ang epicenter sang linog ang yara sa 160 km sa nakatungdan sang Caracas.
Ang 7.2 magnitude nga linog ang nabatyagan sa San Felipe, ang capital city sang Yaracuy state alas-6:04 sang gab-i sa Venezuela ukon alas-6:04 kaina sang aga sa Pilipinas.
Ini ang nasundan makaligad sang 40 segundos sang 7.5 magnitude nga linog 23 km sa nabagatnan-nasidlangan sang Yumare town, sa Yaracuy state gihapon.
Ginpahayag ni Venezuelan interior minister Diosdado Cabello nga may mga nagkalarumpag nga mga buildings kag mga balay bangod sa mabaskog nga linog.
Ginalantaw naman sang USGC nga magadangat sa 10,000 tubtob 100,000 ang napatay sa pagtay-og.
Nagpagwa man sang tsunami threat ang US Tsunami Warning System sa Puerto Rico kag US and British Virgin Islands, kasubong man sa baybayon sang Venezuela nga ginalakipan sang Aruba, Curaçao and Bonaire, apang ang warning ang ginbatak man gilayon makaligad sang isa ka oras.
Nahibaluan nga holiday sa Venezuela subong nga adlaw bangod ginasaulog ang 1821 military victory sa Independence day ukon pagkahilway gikan sa pagsakop sang Spain.
Ginpahayag sang pito ka tuig na nga nagatrabaho bilang British Primary School Teacher sa Caracas, Venezuela nga ang nabatyagan nga pagtay-og amo na ang pinakamabaskog nga linog nga iya nabatyagan humalin sang nagpuyo sa pungsod.
Sa interview sang Bombo Radyo Bacolod kay Bombo International News Correspondent Alan Chung, aminado ini nga may mga nagaluntad gid man nga mga pagtay-og sa pungsod apang sa masami mahinay lamang.
Ginapakamaayo sini nga siya ang yara sa balay sang iya abyan sang matabo ang linog, kag wala man sang damage ang balay.
Apang suno diri, madamo sang mga buildings nga nagkalaguba kag ang iban ang narumpag gid.
Pahyayag ni Chung nga apisar segundos lamang ang ginlawig sang pagtay-og, apang sa kabaskugon sini, sa pamatyag nila ini ang tuman ka lawig.
Sa karun, ang ila source sang impormasyon amo ang Instagram, kag nakita man sini ang mga report nga mahimo magdangat sa 100,000 ang casualties.
Sporadic ukon nagadula-dula man ang kuryente sa apartment building sini.
Suno kay Chung, may duha ini ka kuring nga nabilin sa iya apartment unit nga plano sini balikan bwas agud kuhaon.
Ginatsekyar niya lamang ang mga ini paagi sa camera nga installed sa iya cellphone, kag didto man niya nahibaluan nga nagadula-dula ang kuryente.
Nakabatun man ini sang impormasyon nga may nagcollapse nga building kalapit lamang sa iya gina-estaran kag sa inisyal, may-ara na sang walo nga narecover nga bangkay.
Sa karun nagapadayun pa ang search and rescue operations, kag ginapanugyan na lamang sa mga pumuluyo nga indi anay magsulod sa mga buildings.
Ginalantaw niya nga indi man ini gilayon makabalik sa pagtudlo bangod magapatigayon paman sang risk assessment sa eskwelahan.
Apang sa pito ka tuig sa pungsod, nakita sini nga resilient ang mga Venezuelan kag apisar malawigan sang pila ka semana, nagapati ini nga magabangon ang mga ini nga mas mabaskog.
