Nagdesisyon si Bacolod City Mayor Alfredo ‘Albee’ Benitez nga gamiton na lamang ang P525 million budget para sa total rennovation sang Burgos Public Market sa pagkay-o sang Legislative Building kag Old City Hall.
Ini kasunod sang pagpamatok sang mga vendors sa Burgos Public Market nga gub-on ang merkado kag sila ang temporaryo nga isaylo sa lain nga pwesto.
Sa interview sang Bombo Radyo Bacolod kay Councilor Celia Flor, chairperson sang Committee on Markets sa Sangguniang Panlungsod, bangod mabudlay ipatuman ang pagkay-o sang merkado, kag nakita nga ginakulang sang budget ang pagkay-o sang legislative building kag old city hall, ginduso sang alkalde nga amyendahan nalang ang kontrata.
Paathag sini nga listing lamang sang pagagamitan sang budget ang kinahanglan nga islan sa loan contract, apang ini ang kinahanglan maglabay sa Sangguniang Panlungsod.
Sa pihak nga bahin aminado si Flor nga dako ang ulubrahon sa Burgos Public Market, kag kun magpatigayon sang repairs kaangay sa ginapangayo sang mga market vendors, kinahanglan gid isarado ang pila sa mga pwesto, gani sila ang paggwaon man gihapon.
Isa sa problema ang nagatulo nga atop, nga ginakatingala man ni Flor bangod bag-o lamang ini makay-o, gani luyag man sini nga makasugilanon ang contractor sini.
Suno diri, may trust fund ang merkado kag 50 porsyento sini ang natalana sa repairs.
Ang source sang trust fund ang gikan sa collection sang renta, apang isa sa problema bangod madamo sang wala nagabayad gani ginakulang ang budget.
Pasalig man ni Flor nga pangitaan nila sang budget para sa repairs, gani magahulat gid anay ang mga market vendors.
