20 ka fire personnel ang ginpadala sang Bureau of Fire Protection sa Negros Occidental agud nga magbantay para sa seguridad man sang mga bisita sa patigayunon nga 2025 Panaad sa Negros Festival sa Panaad Park and Stadium, Barangay Mansilingan, Bacolod City.
Sa interview sang Bombo Radyo Bacolod kay Fire Officer 1 Jerry R. Castillo, Acting Chief for Special Operation sang BFP-Negros Occidental, magluwas sa nasambit nga personnel, gindeploy man ang duha ka unit sang fire track nga halin sa Mansilingan kag Alijis Substation.
Suno kay Castillo, sa 20 ang 14 ang para sa deployment kag ang anum ang yara sa firetrucks kun sa diin tag tatlo ka personnel sa kada truck.
Ginpahayag man sini nga preparado na ang mga personnel kag ginahulat lamang nila ang mga dapat ipatuman bangud ang tanan nga instructions nga ginasunod ang nagikan kay Provincial Disaster Risk Reduction Management Office Head Bel Ploteِña.
Aminado si Castillo nga kulang ang fire personnel sa kada fire stations sa probinsya gani ang BFP-Negros Occidental ang nagkuha lang sang isa sa tagsa ka fire stations agud nga iaugment sa deployment para sa selebrasyon sang 2025 Panaad sa Negros.
Ginlibot man sang mga fire personnel ang kada booth sang mga LGUs sa Panaad agud nga masiguro nga may yara ang mga ini sang pamatay sunog kag masiguro ang mga electric wirings nga nainstall sa mga ini.
Ang duha ka fire trucks ang nakastandby naman para sa patigayunon nga fireworks.
Gin-agda man sini ang mga pumuluyo nga magkadto sa Panaad Park and Stadium para sa selebrasyon sang Panaad sa Negros Festival bangud ginapasiguro sini nga safe ang venue bangud magluwas sa ila may yara man sang mga law enforcers nga nagabantay sa seguridad sang tanan.
