Ginkansela ang byahe sang barko sa Negros Occidental bangod sa Severe Tropical Storm OPONG.
Sa interview sang Bombo Radyo Bacolod kay Philippine Coast Guard Station Northern Negros Occidental Spokesperson Lieutenant Junior Grade John Hoffer Olis, ginkansela ang mga byahe bangod ang port of origin kag port of destination sang mga barko ang napaidalum sa Tropical Cyclone Wind Signals.
Pahayag ni Olis, ginabasehan sang kanselasyon sang byahe amo ang weather forecast sang Philippine Atmospheric, Geophysical and Astronomical Services Administration (PAGASA).
Alas-5:00 subong nga aga, ginpaidalom na sa Signal No 2 ang extreme northern portion sang Negros Occidental nga ginalakipan sang Toboso, Escalante City, Sagay City, Cadiz City, Manapla, Victorias City kag Enrique B. Magalona; samtang Signal No 1 naman sa Calatrava, Salvador Benedicto, San Carlos City, Silay City, Talisay City, Bacolod City, Bago City, Murcia, La Castellana, Valladolid, Pulupandan, La Carlota City, San Enrique, Pontevedra, Moises Padilla, Isabela kag Hinigaran.
May mga narecord man nga stranded passengers, cargo kag passenger vessels sa pila ka mga pantalan.
Sa karun yara na sila sa full alert status kag pahanumdom sini nga strikto nga ginadumilian ang pagpalawod bangod sa makusog nga balod kag padayon nga magbantay sa update sang lakat sang panahon.
