Patay ang tatlo ka pulis kalakip na ang hepe, matapos magbato ang gin-aresto nga pulis nga suspect sa pagpangluthang sa Sibulan, Negros Oriental.
Ang suspect ang ginkilala nga si Police Staff Sgt Bonifacio Saycon, nga una nga nagpaniro sa SAB Resto Bar kag nakapatay sa sibilyan nga si Sheila Mae Dinaonao alas-9:35 kagab-i.
Sa interview sang Bombo Radyo Bacolod kay Police Regional Office – Negros Island Region Spokesperson Police Lt Col Joem Malong, nagresponder ang hepe sang Sibulan Municipal Police Station nga si Police Captain Jose Edrohil Cimafranca, upod kanday Police Senior Master Sgt Tristan Chua kag Patrolman Rey Albert Temblor.
Samtang ginabyahe ang suspect padulong kuntani sa Sibulan Municipal Police Station sakay sa pribado nga Mitsubishi Lancer, gina-alegar nga nagbato si Saycon kag ginpangluthang ang tatlo ka nag-aresto nga kapulisan.
Sa footage, nakita nga ang duha ka pulis ang yara sa atubang, samtang isa lamang ang yara sa likod nga nagabantay sa suspect.
Wala pa matumod kun paano gintiro sang suspect ang mga kaupdanan nga pulis, kag kun ini ang ginposas sang naaresto.
Matapos sang krimen, nagpalagyo si Saycon kag nagsurrender sa Tanjay City Police Station alas-10:40 kagab-i.
Nahibaluan nga nagasaulog sang iya nga kaadlawan ang hepe kahapon.
Sa karun, wala pa matumod ang motibo sa krimen.
Suno kay Malong, nagmando na si PRO-NIR Director Police Major General Arnold Thomas Ibay sang paghuman sang Special Investigation Team sa Regional Level.
Ipaidalom man subong nga adlaw si Saycon sa inquest proceedings, kag ini ang mangatubang sang criminal kag administrative cases.
