May yara na sang mga preemptive measures nga ginapatigayon ang Civil Aviation Authority of the Philippines (CAAP) sa Bacolod-Silay Airport agud malikawan ang pagsulod sang 2019 novel coronavirus sa probinsya.
Sa interview sang Bombo Radyo Bacolod kay Ofelia Leonardo, Public Information Officer sang CAAP sa Bacolod-Silay Airport, ginpahayag sini nga may mga mitigation na sila nga ginahimo kaangay na lamang sang pagsuksok sang mga face masks sang tanan nga mga personnel, pag-panghugas sang kamot, kag paglikaw sa madamo nga mga tawo.
Magluwas diri, ginkumpirmar man ni Leonardo nga may yara sang isolation room sa airport.
Dugang pa sini nga nagpasalig man ang Provincial Quarantine Office nga mangbutang sila sang mga info-graphics sa airport nahanungod sa nCoV.
Ginpasiguro man ni Leonardo nga malayo nga makasulod ang virus sa probinsya bangud wala man sang international flight diri.
Suno sa iya, kun may yara gid man sang mga foreign nationals nga maga-usar sang connecting flights, sigurado naman siya nga nausisa na ini sang husto sa NAIA terminal bangud may mga thermal scanner didto kag may mga health card declaration.
Samtang, ginkumpirmar sang Civil Aviation Authority of the Philippines sa Bacolod-Silay Airport nga nagpakig-angot na sa ila ang provincial government sang Negros Occidental subong man ang ciudad sang Bacolod tuhoy sa 2019 novel coronavirus.
Sa interview sang Bombo Radyo Bacolod kay Ofelia Leonardo, Public Information Officer sang CAAP sa Bacolod-Silay Airport, ginpahayag sini nga nagpasalig na si Governor Eugenio Jose “Bong” Lacson nga magapakig-angot ini sa Department of Health agud mamonitor ang mga may suspected case sang nCoV sa pungsod.
Sa karon suno sa iya ginahulat pa nila ang tikang nga pagahimuon sang probinsya.
Samtang, nag-courtesy call naman ang airport manager kay Bacolod City Mayor Evelio “Bing” Leonardia.
Suno kay Leonardo, nagpamangkot ang alkalde kun ano ang contingency plan sang airport pananglitan nga may may makasulod nga turista nga may dala nga virus.
Nagpasalig man si Leonardia nga in kaso may yara sang makitaan nga sintomas sang flu, gilayon nga magpakig-angot sa ciudad sang Bacolod bangud may mga on-call nga ambulansya nga handa magdala sa pasyente sa ospital.
