BACOLOD CITY — Tuman ang pasalamat sa Diyos sang tiyo ni Cadet First Class Fritz John Vallador nga magatapos ini sa Philippine National Police Academy bilang valedictorian sang Class 2018.
Sa interview sang Bombo Radyo, ginpasalamatan ni Edwin Deocares sang ciudad sang Kabankalan ang nadangatan sang iya hinablos.
Si Deocares kag ang iya misis ang nagtindog nga guardian ni Vallador sang nag-eskwela ini sa Kabankalan bangud yara sa Espanya ang iya iloy.
Suno kay Deocares, tumandok sang Himamaylan si Vallador apang naghingyo ini nga sa balay sang iya tiyo sa Kabankalan magatinir rason nga didto siya nag-eskwela sa high school.
Aminado man si Deocares nga honor student na ang iya hinablos halin sang yara ini sa elementarya kag handom gid sini nga mangin pulis.
Sanday Vallador ang apat ka mag-ulutod kag siya ang kamagulangan.
