Patay ang isa ka Citizen Armed Force Geographical Unit (CAFGU) member matapos nga ginbuno sang kapareho man sini nga CAFGU member sa Yning Detachment sa Brgy. San Pablo, Manapla, Negros Occidental nagligad nga Lunes sang gab-i.
Ginkilala ang biktima kay Joseph Claro, 41-anyos kag residente sang Hda. Anicita sa amo nga barangay samtang ang suspetsado naman amo si Noel Garcia, 30-anyos kag residente sang Hda. Minoro, Barangay 14, ciudad sang Victorias.
Sa interview sang Bombo Radyo Bacolod kay P/Major Jaynick Bermudez, hepe sang Manapla Municipal Police Station, ginpahayag sini nga naga-duty ang duha sa guardhouse sang detachment apang bangud sa pag-yinamuhatanay, nagpangutos kag naimpito ang suspetsado rason nga ginbuno niya sa natuo nga bahin sang tiyan ang biktima gamit ang patalum.
Gilayon naman nga nakapalagyo si Garcia samtang ginhingagaw pa dala sa ospital si Claro bangud nga wawa ang tiyan sini kun sa diin nagagwa na ang iya tinae.
Apang, gindeklarar siya nga dead on arrival sang doktor sa Teresita Lopez Jalandoni Provincial Hospital.
Gilayon naman nga nagpatigayon sang hot pursuit operation ang kapulisan batok sa suspetsado.
Suno kay Bermudez, nagpauli si Garcia sa iya nga balay sa Victorias City kun sa diin nagsungka man ini dayon sa mga otoridad.
