Patay ang 27 anyos nga call center agent matapos mahit and run sang pick up truck sa Araneta Street malapit sa Magsaysay flyover, sa Barangay Singcang-Airport, Bacolod City kahapon sang kaagahon.
Sa imbestigasyon sang Traffic Management Unit sang Bacolod City Police Office (BCPO-TMU) nagabyahe padulong sa norte ang motorsiklo nga ginamaneho ni McKevin Absen, 28 anyos, samtang backrider naman ang iya live-in partner nga si Trisia Ann Ovas, 27 anyos, residente sa SP Village, Barangay Pahanocoy, Bacolod City.
Suno sa security guard nga nakawitness, mabaskog ang ulan sang nasambitan nga tion kag madasig ang padalagan sang motorsiklo.
Bangod sa madanlog nga dalan, nagslide ang motorsiklo nga nagresulta sa paglabot sang backrider.
Ang motorsiklo ang nagslide sang kapin 55 ka tapak gani malayo man ang gin-apukan sang babayi nga nagdangat sa opposite lane.
Didto naman kag hinali nga nalapakan sang pick up truck ang babayi.
Sa karun padayun ang panawagan sang pamilya sang biktima sa driver sang pick up truck nga magsungka na.
