BACOLOD CITY-Nagahabok kag nagapanimaho na ang bangkay sang isa ka call center agent sang nasapwan sa iya balay sa Brgy. Taculing ciudad sang Bacolod kaina sang aga.
Ginkilala ang biktima kay Elbric Lagradillo, 52-anyos sang Terese 1, Eufemia compound Brgy. Taculing.
Sa impormasyon nga nakuha sang Bombo Radyo Bacolod, nagaisahanon lang si Lagradillo nga naga-istar sa iya balay apang kaingod man sini ang iya utod nga babaye nga isa ka bulag.
Ulihi nga nakita si Lagradillo sang iya mga kaingod nga nagareklamo nga nagalain ang iya pamatyag kag nagahubag ang tiil.
Nahibaluan nga may yara na nga daan sang ginasufrer nga balatian ang biktima kag ini ang ginapatihan nga gin-atake sa tagipusuon.
Una nga nagresponder ang City Disaster Risk Reduction and Management Office (CDRRMO) sang Bacolod sa insidente kag ginpahayag sang mga ini nga posible, tatlo tubtob apat na ka adlaw nga patay ang biktima.
