Nagabalik na sa normal ang sitwasyon sa ciudad sang Canlaon matapos ang nakaligad nga paglupok sang Bulkan Kanlaon.
Sa interview sang Bombo Radyo Bacolod kay Seth Bariga, Public Information Officer sang ciudad, nagapadayon na liwat ang nagkalain-lain nga aktibidad sa ciudad lakip na ang pagbalik sang klase kag ang pagpatigayon sang mga aktibidad para sa pista.
Suno diri, may-ara lamang sang duha ka barangay ang nakaeksperyensya sang light ashfall, ang Barangay Masulog kag Barangay Pula.
Apisar sini, wala ginsuspende sang ciudad ang pagsaulog sang ila nga pista.
Ginpabutyag man ni Bariga nga padayon ang pagpalab-ot sang impormasyon sa publiko agud masiguro ang kahilwayan sang tanan kag ginapaandaman gihapon ang mga pumuluyo nga magpabilin nga alerto kag indi magpabaya.
Ginpanugyan man niya sa kada panimalay nga maghanda sang “go bag” nga mahimo dal-on gilayon kun may posible nga mas mabaskog nga paglupok sa masunod nga mga inadlaw.
May yara gihapon sang pila ka pamilya nga nagpabilin sa sulod sang ila balay bilang paghalong, samtang ginpahanumdom ang tanan nga magbantay gid sa sitwasyon kag magsunod sa mga pahanumdom sang mga otoridad.
