BACOLOD CITY-Ginkompirmar sang pinuno sang Coastguard Station Negros Occidental nga iga-divert ang MV Unicorn Bravo sa Iloilo subong nga adlaw.
Sa interview sang Bombo Radyo kay Colonel Jansen Benjamin, ginpahayag sini nga nagpatigayon sang pamulong-pulong ang consignee kag shipping company sang MV Unicorn Bravo kag nadesisyunan sang mga ini nga i-divert kag i-unload ang cargo sang vessel sa Iloilo karun nga adlaw bilang compliance sa mando ni Mayor Evelio “Bing” Leonardia nga pag-ban ukon pagdumili sa pagdungka sang mga barko nagikan sa China, Hong Kong kag Macau sa pantalan sang ciudad bangud sa coronavirus disease (COVID-19) scare.
Suno kay Benjamin, depende na sa gobyerno sang Iloilo kun pahanugutan nila nga magdungka ang vessel.
Nahibaluan nga abono ang karga sang MV Unicorn Bravo kag ginapanag-iyahan ini sang La Filipina Uy Gongco Corporation.
May yara sang 19 ka crew ang cargo vessel kun sa diin 15 ang Chinese samtang 4 naman ang mga Myanmar nationals kag Xiamen, China ang Last Port of Call sini.
Gin-athag naman sang coastguard commander nga wala sang may nagsaka nga quarantine officer sa barko.
Nagpasalig man si Benjamin nga wala sang dapat kabalak-an ang publiko bangud istrikto nga ginamonitor sang coastguard ang mga foreign vessels kag ginaubra sa local government ang tanan agud maprotektahan ang ciudad sa coronavirus scare.
