(Update) BACOLOD CITY — Gin-release na sang Department of Social Welfare and Development ang cash grant para sa mga benepisyaryo sang Pantawid Pamilyang Pilipino Program sa idalom sang Unconditional Cash Transfer sang gobyerno para sa Tax Reform for Acceleration and Inclusion (TRAIN) law.
Sa pahayag sang DSWD, 1.8 million households ang nagbaton sang financial assistance sa bulig sang Land Bank of the Philippines kag una nga makabaton ang may yara sang cash cards.
Bangud sini, sarang na nga mawithdraw sang Pantawid beneficiaries ang ila cash grant para sa tuig 2018 nga nagabalor 2, 400 pesos paagi sa Land Bank Automated Teller Machines (ATM) nationwide.
Kahapon, gincredit ang UCT grant sa 419,663 ka mga beneficiaries sa National Capital Region, Regions I, II, kag Cordillera Administrative Regions samtang gincredit naman ang UCT grant sa mga benepisyaryo sa iban nga rehiyon subong nga adlaw.
Suno kay DSWD Officer-in-Charge Emmanuel Leyco, 1.8 million ka Pantawid beneficiaries ang una nga makabaton sang UCT cash grants nagikan sa kabug-usan nga 10 milyones ka target recipients bangud may yara na sila sang active cash cards nagikan sa Land Bank.
Ang cash grant para sa 1.8 million ka benepisyaryo ang nagabalor sang masobra 4.3 billion pesos.
