BACOLOD CITY — Nagaluntad ang panalagsa nga power interruption sa mga nasakupan sang Central Negros Electric Cooperative ukon CENECO bangud sa pagkaguba sang ginakuhaan sang supply sang kuryente sa probinsya sang Leyte kasunod sang magnitude 6.5 nga linog sang Huwebes sang hapon.
Suno kay CENECO general manager Sulpicio Lagarde Jr., ini ang kaangay na gid lamang sang natabo sang tinalikdan nga gab-i kun sa diin nagkulang sang 40 megawatts ang supply sa grid.
Ini ang pagatungaon kuntani sang mga electric cooperative sa isla sang Negros ugaling wala na nakig-share diri ang CENECO bangud may yara man sang reserba ang kooperatiba.
Kun natigayon ang tinungaay sang load suno kay Lagarde, mga 1/3 sang Bacolod ang wala sang power.
Sa pihak sini, may yara sa gihapon sang kulang sa power load apang pila lang ka parte sang ginasuplayan sang CENECO ang wala sang supply.
Suno kay Lagarde, may kakulang sa supply nga nagalab-ot sa CENECO kag sa iban nga kooperatiba bangud dako kuntani ang ginahatag sang power plant sa probinsya sang Leyte nga naguba kasunod sang linog.
