BACOLOD CITY — Nakabawi ang Ceres Negros Football Club sa Home United FC kag nangin kampeon sa 2017 AFC Cup ASEAN Zonal Finals kagab-i.
Wala ginpa-score sang Ceres Negros FC ang Home United FC sang Singapore kun sa diin natapos ini sa 2-0.
Una nga naka-goal para sa Negros-based team si Jose Elmer Porteria nga gin sundan ni Manny Ott antes natapos ang first half.
Natapos ang match-up nga wala na sang natigayon nga goal sa second half.
Bangud sang ila kadalag-an, sulod na ang Ceres Negros sa inter-zonal semifinals sang AFC Cup nga hiwaton sa bulan sang Setyembre.
Apisar nga nalutos ginakalipay naman sang head coach sang Home United nga si Aidil Sharin Sahak ang resulta sang hinampang bangud nga ginhimo sang iya mga players ang ila nga masarangan.
Tuman naman ang pagpasalamat sang Ceres Negros FC coach nga si Risto Vidakovic sa suporta sang mga fans.
Samtang, proud naman si Stephan Shrock nga mangin kabahin sang Ceres Negros FC.
Madumduman nga sang nagligad nga semana, nalutos ang Ceres sa score nga 2-1 sa ila hampang nga ginhiwat sa Singapore.
Nagduag yellow naman ang Panaad Park and Stadium kagab-i nga amo ang jersey color sang Ceres Negros FC kun sa diin nagdangat sa 7,534 ang fans nga nagsaksi sang hinampang.
