Ginpamatud-an sang chairman sang Bombo Radyo Philippines nga may dako nga gintigana sa iya ang Mahal nga Makaako gani luwas ini nga nakabalik sa luyo sang iya pamilya makaligad ang masobra duha ka bulan humalin sang ini ang ginkidnap sa Iloilo kag gindala sa Negros Occidental.
Subong nga Nobyembre 14, ginahanduraw ni Dr. Rogelio M. Florete ang ika-30 nga anibersaryo sang iya pagkahilway nagikan sa kamot sang mga kidnapper nga nagtago sa iya sa Brgy. Caduhaan, Cadiz City sang tuig 1989.
Si Dr. Florete ang ginkidnap sa Jaro, Iloilo City kun sa diin kaupod niya sadto ang iya anak nga babayi.
Siya ang gindala sa Leganes, Iloilo kag ginpasakay sa pumpboat, ginposasan kag gintabok sa Talisay City, Negros Occidental.
Diri ginhatagan si Florete sang bag nga may unod nga bayo kag personal nga kagamitan antes sila nagsaka sa kabukiran.
Samtang yara sa luyo sang mga kidnapper, hilway man si Florete nga maglagaw-lagaw sa ila ginahukmungan samtang nagapamati man sila sa radyo gani updated ini gihapon sa mga nagakatabo.
Apang aminado ang chairman nga nag-untat ang renovation kag mga aktibidad sang Bombo Radyo Philippines samtang yara siya sa captivity.
Makaligad ang 72 ka adlaw nga negosasyon, ginhilway si Dr. Florete kag nagsakay siya sa jeep pabalik sa Bacolod.
Nagderetso ini sa estasyon sang Bombo Radyo Bacolod apang wala siya gilayon nga ginpasulod sang gwardiya bangod wala niya nakilala ang chairman.
Nagahulat naman sa estasyon ang iya pamilya.
Suno kay Dr. Florete, may yara sang madulom nga mga hitabo sa kabuhi sang tawo apang pagbuot ini sang Diyos.
