Maisog nga nagsabat si anay Ilocos Sur Governor Chavit Singson angot sa posibilidad nga siya ang makasuhan sang inciting to sedition bangod sa mga pahayag sini batok sa Presidente, sa masobra duha ka oras nga “The Grand Conspiracy” press conference kahapon, Lunes, Enero 5, 2026.
Ginpanginwala ni Singson ang gin-alegar nga kaso sang plunder batok sa iya kag nakahanda ini nga magpapriso kun matuod.
Samtang ginatudlo man ni Singson nga si President Ferdinand Marcos Jr. kag anay House Speaker kag Leyte 1st District Rep. Martin Romualdez ang ginaalegar “mastermind” sa issue sang korapsyon sa mga flood control projects sang Department of Public Works and Highways (DPWH).
Sa press briefing kahapon, ginpahayag ni Singson nga ginlakip si Former Ako Bicol Party-List Representative Elizaldy ”Zaldy” Salcedo Co agud mangin mas malapad kag organisado ang pagtipon sa mga flood control projects.
Ginpresentar man sang anay gobernador ang 14 ka mga kongresista nga ginapahayag may yara sang binilyon nga balor sang allocables.
Nagapanguna diri amo si House Majority Leader Sandro Marcos nga gina-alegar may masobra P15 billion nga allocables para sa flood control projects samtang wala pa sang sabat ang Malacañang sa mga alegasyon nga ginpalab-ot ni Singson.
Nagpanawagan man ang anay gobernador sa mga relihiyoso nga grupo nga magtingob kag maghiwat sang hublag protesta bangud sa ginaalegar maanomaliya sa flood control projects sang gobyerno.
Pahayag pa niya, personal siya nga magahambal sa nagkalain-lain nga relihiyoso nga organisasyon agud ma-engganyo ang ila paghiliusa sa panawagan nga pamatukan ang graft kag corruption.
Gin-engganyo man sini ang mga Pinoy nga magpartisipar sa iya gintawag nga “one-time, big-time” rally.
