BACOLOD CITY — Nangin one-sided ang ginligwat nga bersyon sang Anti-Hospital Deposit Law.
Ini ang ginpahayag ni Dr. Hector Gayares, chief of hospital sang Bacolod Adventist Medical Center (BAMC), sa exclusive interview sang Bombo Radyo tuhoy sa mas ginpataas nga penalidad batok sa mga hospital nga indi mag-confine sang pasyente nga wala sang deposito.
Suno kay Gayares, sa pagdangat pa lamang sang pasyente sa isa ka pribado na bululngan, ini ang ginapadapatan na sang pagbulong kag kun yara na ini sa estable nga kondisyon, papilion na ini ukon ang iya pamilya kun luyag sini magpa-confine sa diin magabayad ini sang deposito apang kun indi ini makasarang, ini ang igasaylo sa publiko nga hospital.
Pananglitan pilion sang pasyente nga magsaylo sa isa ka government hospital, suno kay Dr. Gayares, mahul-an ang private hospital bangud wala sang magabayad sang gingamit nga bulong kag pasilidad agud mangin estable ang sitwasyon sang pasyente.
Suno sa BAMC chief of hospital, kuntani kadungan sang rebisyon ang paghatag sang alternatibo sa diin sarang mabawi sang private hospitals ang ila gingasto nga amo man ang ila igabayad sa ila nga mga suppliers kag empleyado.
Ginpabutyag ni Dr. Gayares nga kabulig sang gobyerno ang pribado nga sektor sa pagtatap sa ikaayong lawas sang mga pumuluyo apang sa idalom sang Anti-Hospital Deposit Law, ang pribado nga hospital ang labi nga apektado.
