Ginkondenar sang Armed Forces of the Philippines ang paggamit sang flares sang Chinese air force sa alagyan sang eroplano sang Philippine Air Force nga nagapatrol sa kahawaan sang Bajo de Masinloc, nga traditional fishing ground sa Zambales.
Suno kay AFP chief of staff Gen. Romeo Brawner Jr. hugot nga ginakondenar sang Philippine military ang peligroso nga provocative actions ukon panggarit-garit sang People’s Liberation Army Air Force (PLAAF) nga nagbutang sa risgo sang kabuhi sa mga personnel nga nagapatigayon sang maritime security operations sa sulod sang Philippine maritime zones.
Suno kay Brawner, ang Philippine Air Force NC-212i propeller-driven light transport airplane ang nagapatigayon sang ‘routine maritime patrol’ sa kahawaan sang Bajo de Masinloc, nga ginatawag man nga Panatag kag Scarborough Shoal sang Agosto 8 kun sa diin ang aircraft sang Chinese air force ang nagpatigayon sang delikado nga maneuver kapin alas-9:00 sang aga kag nagdagdag sang flares sa alagyan sang eroplano sang Philippine Air Force.
Apisar nga nakabalik sang hilway ang eroplano sa Clark Air Base, panindugan sang AFP nga ang natabo ang pagbayolar sa lawful flight operations sa sulod sang Philippine sovereignty kag jurisdiction kag supak sa international law and regulations may kaangtanan sa safety of aviation.
Samtang, ginpanindugan sang Armed Forces of the Philippines (AFP) nga padayunon nila ang patrol kag surveillance operations sa Scarborough Shoal ukon Bajo de Masinloc, kasunod sang peligroso nga provocative actions ukon panggarit-garit sang China air force.
Pahayag ni AFP spokesperson Colonel Francel Padilla nga ipabilin nila ang soberanya kag seguridad sa maritime domain sang pungsod apisar sa insidente nga nagbutang sa risgo sa kabuhi sang AFP personnel.
Panindugan ni Padilla nga padayun nila nga tindugan ang commitment sa pag-exercise sang kinamatarong santo sa international law, partikular na sa United Nations Convention on the Law of the Sea (UNCLOS) may kaangtanan sa freedom of overflight.
Nahibaluan nga duha ka aircraft sang People’s Liberation Army (PLA) Air Force ang nagpatigayon sang peligroso nga maneuvre kag nagdagdag sang flares sa alagyan sang NC-212i Philippine Air Force (PAF) propeller aircraft nga nagapatigayon sang routine maritime patrol sa kahawaan sang Scarborough Shoal kapin alas-9:00 sang aga sang Huwebes.
Apisar nga wala sang personnel on board nga nasamaran, ginpanindugan ni AFP chief General Romeo Brawner Jr. nga ang Chinese aircrafts ang nagpasilabot sa lawful flight operations kag nagbayolar sa international law may kaangtanan sa aviation safety.
Apang panindugan naman sang Southern Theater Command sang Chinese People’s Liberation Army, nga apisar sa makapila na nga warnings sang China sa Philippine aircraft, nagpadayun gihapon sa illegal nga pagsulod sa airspace sang Huangyan Island.
Suno diri sila ang nagapatigayon sang professional, abided by norms, legitimate kag legal on-site operation, kag ini ang naguba bangod sa gintawag nila nga infringement kag provocation sang Pilipinas.
