Nag-eksperyensya sang lapnagon nga pagbaha ang dako nga bahin sang ciudad sang Bacolod bangod sa bagyo VERBENA.
Ang Bacolod City kag bilog nga Negros Island Region ginpaidalum sa Tropical Cyclone Wind Signal No. 1.
Madamo sa ciudad nga wala nakaeksperyensya sadto sang pagbaha, ang sa karun gulpyada lang ginlab-ot sang tubig-baha.
Kaina sang aga, nagdangat tubtob sa hawak sang tawo ang kataason sang tubig baha sa Brgy Mandalagan.
Nagsaka ang tubig sa bahin sang Purok Carvic matapos nga maguba ang pader sa suba tubtob nga naglapaw ang tubig kag naggwa sa dalan.
Pila lamang ka minutos ang naglabay, nalikop na ang bilog nga dalan kag madasig ang pagsaka sang tubig tubtob sa hawak kag sa dughan sang tawo.
Iban nga nagamotorsiklo, nanaog na lang kag gintulod ang ila motor.
Samtang may yara man sang mga stranded nga mga salakyan kun sa diin iban nga mga pasahero nagdesisyon na lang nga manaog kag maglakat sa baha.
Bisan ang estasyon sang Bombo Radyo Bacolod may isa na lang ka lintang nga nabilin kag malab-ot na sang baha.
Samtang, wala naman untat ang pagrescue sang personnel sang Bureau of Fire Protection, Philippine Red Cross kag volunteer groups sa mga nastranded ilabi na sa mga pumuluyo bangod sa madalom nga baha kag makusog nga daludo sang tubig.
