Nagpatigayon sang presentation ang ciudad sang Kabankalan para sa target nga Flood-Free Kabankalan City.
Sa interview sang Bombo Radyo Bacolod kay Kabankalan City Mayor Benjie Miranda, sila ang nagconvene sang Task Force Baha.
Paathag sang alkalde nga denekada na nga problema sa ciudad nga kun may bagyo, ukon bisan Low Pressure Area lamang permi nga naga-anaw ang Kabankalan City partikular na sa poblacion area.
Suno diri, manami pamatian nga sa pagtukod sang Negros Island Region, ang Kabankalan City ang makabig nga sentro, apang indi manami kun masami gihapon nga ginabaha sa tion nga magdamol ang ulan.
Dugang pa ni Miranda nga sa mga pagbaha, binilyon ka pesos ang ginatuga nga kahalitan sa mga pananom kag madamo man sang mga pagkabutang kag salakyan ang nagakalaguba.
Kalakip sa rasun sang pagbaha ang pag-awas sang mga suba, gani target nila nga padaluman ang manabaw na nga mga suba kag hawanan ang water ways.
Kalakip naman diri ang pag-address sa problema sa drainage systems.
Aminado si Miranda nga ini ang presentasyon pa lamang sang plano gani wala pa sang nalatag nga budget.
Apang luyag sini nga maunahan sang local government unit ang pagpondo sa programa agud makita man sang National Government nga sila ang may inisyatibo.
Nagalaom ini nga suportahan man sang National Government kag hatagan sang dugang nga budget ang ila nga lihok.
