Apat tanan ka mga persona ang arestado kalakip ang bana sang isa ka punong barangay sa banwa sang Isabela matapos ginserbehan sang search warrant sa ila balay kaina sang aga.
Kalakip sa mga naaresto ang duha ka anay suldado nga sanday retired Master Sergeants Alexander Ferrer Jr., bana ni Punong Barangay Ma. Luz Ferrer sang Brgy. 8 Isabela, kag Florentino Lubio.
Naaresto man sanday Dominic Yanson kag Niel Ladrido.
Suno kay Police Captain Roger Pama, apat tanan ka .45 caliber pistol ang nakuha sa mga arestado nga ginalakipan sang duha kay Ferrer kag tag-isa kanday Ladrido kag Lubio.
Nakuhaan man ang mga ini sang madamo nga mga bala.
Suno kay Pama, naga-gwa ang impormasyon nga close-in bodyguard ni Mayor Joselito Malabor sanday Ferrer kag Lubio.
Ang operasyon ginpatigayon sang intelligence branch sang Negros Occidental Police Provincial Office antes ang alas-6:00 kaina sang aga sa Brgy. 8.
Gilayon nga ginpaidalom sa medical exam ang mga arestado kag natalana nga ipaidalum sa inquest proceedings sa kaso nga paglapas sa Republic Act 10591 ukon comprehensive law on firearms and ammunitions kag COMELEC gun ban.
