Gin-ako ni Prosecution witness COA auditor Xylene del Campo nga basi sa iya personal nga interpretasyon, dapat may-ara sang “madakpan” bilang pamatuod nga successful ukon madinalag-on ang ‘payment of rewards’ gikan sa confidential fund.
Ini ang sabat sang testigo sang ginpamangkot ni Senate Trial Presiding Officer Chiz Escudero kun personal nga interpretasyon sini kag wala sa joint circular, nga dapat may madakpan anay antes makarelease sang payment of rewards.
Ang ginatumod nga circular ni Escudero amo ang Joint Circular 2015-01 nga nagaserbe nga opisyal nga guide para sa paggasto kag pag-audit sang Confidential kag Intelligence Fund sang gobyerno.
Ginpamangkoy ni Escudero kun may ideya si Del Campo kun amo man ang standard nga ginasunod sang mga nauna sa iya sa pwesto.
Sabat ni Del Campo nga parehas sila nga nagbase sa joint circular sa ila nga pag-audit.
Apang ginpahanumdom ni Escudero nga wala nakapagkit sa joint circular nga kinahanglan may madakpan antes maka-issue sang payment of reward, gani nagtapos ini sa conclusion nga interpretasyon lamang ini ni Del Campo kag sang mga nauna sa iya.
Ginkumpirmar naman sang witness nga amo ang iya interpretasyon sa joint circular.
