Ginpahayag sang political analyst sa ciudad sang Bacolod nga tiyempo na sang defense counsel ni Vice President Sara Duterte nga depensahan ang paggamit sang mga pangalan kaangay ni Mary Grace Piattos nga isa sa mga nakabaton sang confidential fund.
Sa interview sang Bombo Radyo Bacolod kay Atty Jomax Ortiz, ginabantayan sa karun kun paano nga depensahan sang defense counsel sang bise presidente ang paggamit sang mga pangalan nga kun tsekyaron sa Philippine Statistics Authority (PSA) wala ini nagaexister.
Suno kay Ortiz, palaligban sa karun kun paano nga madepensahan ang mga pangalan nga gingamit apang ang nagpirma sa mga acknowledgement receipts ang palareho lamang nga mga tawo bangud makita nga palareho ang stroke sang pagpirma.
Dugang pa ni Ortiz nga ang paggamit sang mga pangalan kag nalakip pa gani ang pila ka mga apelyido sang mga artista ang wala natalupangdan sa dali-dali bangud kinahanglan nga magasto sa 11 ka adlaw ang confidential fund.
Sa karun ang burden of proof ang yara na sa depensa agud nga mapamatud-an nga nagasto sa insakto ang confidential fund gani ini ang balantayan sa Lunes sa tion nga mag-resume ang impeachment trial.
