Nagtakop na ang pagparehistro sa Commission on Elections subong nga adlaw.
Sa interview sang Bombo Radyo kay COMELEC- Bacolod Head Atty Revo Sorbito, alas- 8:00 kaina sang aga nag-umpisa ang pagcater sa mga registrants kag ini ang tubtob lamang alas- 5:00 subong nga hapon.
Suno diri, alas- 2:00 sang kaagahon pa lamang may yara na sang nagapila sa mall kun sa diin ginapatigayon ang registration.
Tubtob lamang sa 500 ang macater sang COMELEC apang kaina sang aga nagdangat na sa masobra 500 ang nagpila nga nadugangan pa gid sang hapon.
Suno kay Sorbito, humalin pa sang Pebrero nag-umpisa ang pagparehistro kag sa ulihi nga adlaw, amo pa lamang ang pagginutok sang mga registrants.
Suno pa diri, madugay na ini nga nagpanawagan nga indi na magpaulihi pa bangod wala na sang extension pa samtang bwas na maga-umpisa ang filing sang Certficate of Candidacy para sa 2025 Midterm Elections.
Samtang, kalabanan sa mga nagpila para sa last day sang registration ang may rason nga wala sang oras bangod sa trabaho kag klase.
Suno kay Madel Torres, alas- 6:00 sang aga nagpila na ini kag siya ang nakabaton sang numero nga 256.
Suno diri, subong lang ini nagparehistro bangod nga may mga kabataan ini nga naga-eskwela nga iya gina-atipan.
Siya ang magaproseso sang pagtransfer sang iya residency naggikan sa ciudad sang Silay kag sa karun nagapuyo na sa Brgy Tangub, Bacolod City.
