Ginpasakaan na sang kaso nga homicide ang pulis nga nagluthang sa mag-amay sa Barangay Canjusa, Pulupandan, Negros Occidental alas-4:00 sang kaagahon sang Disyembre 25.
Ang biktima amo sanday Joman Fuentes, 21 anyos, single, construction worker kag amay sini nga si Jomarie Fuentes, 52 anyos, kasado, construction worker samtang ang suspect amo si Police Corporal Armin Alanza, 36 anyos, residente sa lugar apang assigned sa 604th Company sang Regional Mobile Force Battalion 6.
Yara sa impluwensya sang makahulubog nga ilimnon si Alanza sang ginsita sini si Joman kag kasunod sini nagluntad ang komosyon.
Ginluthang ni Alanza si Joman nga gintunaan sang kamatayon sini samtang ang amay naman nga si Jomarie ang nakaangkon man sang pilas sang pagpangluthang.
Ginkastigo naman si Alanza sang kapin sa lima ka persona kag nag-angkon sang injury kag gindala sa ospital.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, napasakaan na sang Pulupandan Municipal Police Station si Alanza sang kaso nga homicide.
Suno diri, sa karun hospital arrest si Alanza samtang ginabulong pa ini sa ospital.// Nagpasalig naman si Solis sang madasig kag impartial nga investigation sa natabo.
