Gin-sabat sang commander sang 303rd Infantry Brigade sang Philippine Army ang nangin pahayag sang spokesperson sang Leonardo Panaligan Command nga siya ang naga-panghugas kamay sa nagakatabo nga serye sang pag-pamatay sa probinsya sang Negros Oriental.
Sa interview sang Bombo Radyo Bacolod kay Brigadier General Benedict Arevalo, ginpahayag sini nga naga-pasalamat gid siya bangud ginhatagan naman siya sang tion sang New People’s Army nga ibulgar sa publiko ang tanan nga kabutigan kag kun ano nga sahi ang organisasyon sang makawala nga grupo.
Suno kay Arevalo, wala na dapat gina-sapak kag gina-patihan ang NPA bangud kabutigan lang ang tanan nila nga gina-pahayag sa diin gina-papati nila ang publiko nga insakto ang ila gina-himo.
Nag-depensa man si Arevalo nga wala siya nagapang-hugas kamay bangud ang nagakatabo nga pag-pamatay sa Negros Oriental ang indi kahimuan sang militar, kundi kahimuan sang NPA.
Athag suno sa iya nga mismo ang rebelde nga grupo ang nag-ako nga sila ang nag-patay sa 4 ka mga kapulisan sa Ayungon sadtong Hulyo 18 kag bangud sini, gin-pamatud-an mismo sang NPA suno kay Arevalo nga terorista ang ila nga organisasyon.
Rason nga wala sang dibir ang NPA nga mang-akusar nga ang serye sang pag-pamatay sa subong sa Negros Oriental ang kahimuan sang tropa sang Gobyerno.
Samtang, padayon naman ang panawagan ni Arevalo sa publiko nga indi magpa-into sa mga rebelde bangud indi manami nga ehemplo ang mga ini ilabi na sa mga kabataan kag wala man sang may maayo nga mahatag nga bulig sa pungsod Pilipinas ang NPA kundi kinagamo lang kaangay sang pag-pangilkil, pag-pamatay kag pag-pangsunog kag gilayon naman nila nga i-pasibangod sa tropa sang Gobyerno ang ila kahimuan.
Nadumduman nga ginbalik sang Leonardo Panaligan Command sa militar ang responsibilidad sa serye sang pagpamatay sa probinsya sang Negros Oriental sa diin ginpahayag sang ila tagpamaba nga si Ka Ann Jacinto nga naga-panghugas lang si Arevalo sang iya duguon nga kamot bangud sila ang gina-tudlo sang militar nga amo ang responsable sa pag-pamatay.
Sa tion naman nga may ginsilutan ang komunista nga grupo suno kay Jacinto, wala sila nagabilin sang sulat kundi nagapagwa sila sang official statement agud akuon ang responsibilidad.
